امبارح حصل معايا موقف هحكيه ليكم عشان كل واحد ياخد باله
و ربنا يمنع كل مكروه عن اى حد يا رب
امبارح كنت بعمل فشار فالميكرويف
لو فى حد ميعرفش ازاى
طريقة عمل الفشار بأبسط الطرق
عمل الفشار بالمكرويف
فهى طريقه بسيطه من غير ما تعمل مواعين كتير
بتجيب اكياس حراريه من اى سوبر ماركت
و بتحط الففشار فالكيس و بتقفله و تسيب منه حته صغيره مفتوحه عشان ضغط الهوا جواه ميخلهوش يفرقع
و بتحط الكيس فالميكرويف لمده دقيقتين و نص
و بيطلع احلى فشار
الموقف اللي حصل بقا
و لكن اللى حصل معايا كان مختلف شويه و حاجه لا تتخيلوها
الاكياس الحراريه بيبقا معاها حته بلاستك عشان تقفل بيها الكيس
و لكن النوع اللى انا جبته المرادة كان معاه بدل الحته البلاستك سلك حديد و متغلف بورق زى الصوره تحت بالظبط
 |
| كيس حراري به معدن |
طبعا ممنوع تحط فالميكرويف اى معدن او ورق فويل او اطباق فويل عشان ممكن يسبب حرايق
بس انا مخدتش بالى
قفلت الكيس بالحته المعدن و حطيتها فالميكرويف
و مجرد ما الميكرويف اشتغل و الكيس بدا يتنفخ و يتملى
الحته الحديد اللى قافل بيها الكيس بدات تعمل شراره جامد اوى و فرقعه جامد و صوت كهربه لدرجة ان النار طلعت برا الميكرويف و كانت ممكن تمسك فاى حاجه جمبها
و انا لحسن الحظ كنت قلقان شويه من النوعيه دى من الاكياس فكنت واقف قصاد الميكرويف لحد ما يخلص و شوفت المنظر و بسسسسرعه قمت شايل الفيشه و فصلت الكهربه
طلهت الكيس من جوا عشان افهم ايه اللى حصل
لقيت السلك دا مسود فالورق و الورقه محروقه و الكيس سايح من حواليه و فيه نار
الحمد لله ربنا ستر و كنت واقف قصاد الميكرويف
بس محدش يحط اى معادن جوا الميكرويف
لا شوكه ولا معلقه ولا طبق فويل ولا اى حاجه معدن و لو بسيطه زى ما حصل معايا
و متستخدموش الا الحاجات اللى مكتوب عليها علامة انها تدخل ميكرويف
عشان ما تعملش كوارث لا قدر الله
حذروا اهاليكم و حبايبكم
و خلو بالكم
الدكتور/بسام
تعليقات
إرسال تعليق