المحارة استثمار ام تكلفة1

سمعتك أهم

 اذا كنت شغال فى شقه لسه على المحاره وزبونها بيجيلك كل فين وفين نصيحه خزن اى علبة لون فاضيه ابو بكرة تيب خلصت او شيكارة معجون تم استخدامها واى جردل فاضى وجالون او كيلو خلصت البوية بتاعته عينه فى جنب وحافظ عليه وماترمهوش فى الزباله مهما كان قيمته ونبه على العمال اللى معاك والفنيين اللى شغالين معاك فى الشقه انهم يحافظوا عليها لغاية ماتسلمة للزبون حاجه حاجه واذا لقيت ان الشقه هيبقى شكلها مليان بالعلب الفاضيه كل مايجيلك سلمه الحاجات دى وخليه ياخدها معاه سلمه كل علبه لون وكل بكرة لزق وكل جردل بويه على الكشف صدقنى سمعتك تستاهل تحافظ عليها بأكتر من كده ومتسمحش لاى شخص مهما كان زميل مهنه او زبون او صديق عمل انه يشك فيك سمعتك اهم من الشغل نفسه.. 

لو محتاج جردل فاضى 🗑او اى علبه فاضيه ماتخدهاش وتقوله انا اخدت علبه فاضيه خليه موجود وقوله انا محتاج الحاجه الفلانيه لو امكن اذا وافق ده شيئ جميل اذا رفض فده حقه وهو اللى شاريه بفلوسه صدقنى سمعتك اهم

 لو اضطريتك الظروف انك تاخد بويه وتغيرها علشان الزبون مش فاضى لكن عارف او هو قالك روح غيرها علشان مشغول يبقى يامعلم اهم شيئ الفاتوره📄 حتى لو الزبون بياخد مون على الكشف شكك انت ماتغيرش شيئ الا بفاتوره ووريها للزبون اول ماتشوفه او صورها وابعتهاله على الواتس ✆✆او الماسنجر صورله اللى رجع وصورله الفاتوره واللى جبته صدقنى سمعتك اهم 

لماتيجى تكتب كشف لزبون ماتقولوش هات من عند الموان الفلانى او العلانى علشان دى اول نقطة الشك اكتبله كشفك وقوله هاته من اى حد هو يعرفه واذا قالك ماعرفش حد او عرفنى على اى حد بتتعامل معاه قوله انا بتعامل مع كل الموانين لكن ممكن يكون افضلهم الموان الفلانى والعلانى وماتروحش معاه صدقنى سمعتك اهم لان ممكن الزبون يشوف اى تعبير على وش الموان يفهمها غلط ويشك فيك اكتر ووممكن الموان لما يطلعلك حته عده هديه من عنده الزبون يظن انك بتعمل مصالح على حسابه او ان دى هو دافع تمنها والموان بيهديهالك من فلوسه صدقنى سمعتك اهم. 

 

والاهم من كده ممكن الزبون ياخد بضاعه شكك ويماطل الموان وتلبس انت يامعلم لان انت اللى جايبه وممكن اصلا الزبون ياكل عليك فلوس ويماطل الموان وتلبس انت تانى يامعلم صدقنى سمعتك اهم 

نصيحتى ليك اكتب كشفك وقول لزبونك الكشف معاك لف براحتك وسعره براحتك من عند اى حد ولما تخلص وتلاقى طلبك كلمنى. انت كصنيعى بقدملك من وجهة نظرى حلين اختار افضلهم . اما انك تقول للزبون لما توصل عند الموان ويجيبلك كل الكشف اللى انا طلبته وتحاسب عليه وتدفع حسابه رن عليا وقول للموان الصنايعى عاوز يكلمك فى الحاله دى تقدر بكل زوق وادب تطلب اى حتة عده انت محتاجها زى روله او فرشه او سكينه اذا وافق يبقى انت كده عملت الصح وكبرت فى نظر زبونك واذا رفض يديلك عده يبقى برضه كبرت فى نظر زبونك لانك كلمت الموان بعد الحساب علشان ماكانش يشك فيك وانت معاه لو كان اعطاك اى عده قبل مايحاسب.

 صدقنى سمعتك اهم او انك تقول للزبون الكشف موجود معاك ولو فيه حاجه مش موجوده عند الموان اتصل عليا علشان اقولك تجيب ايه بديل مكانه صدقنى سمعتك اهم واذا اصر الزبون انك تروح معاه تجيب الكشف لازم تكون متأكد اولا ان الزبون اختار موان وانتم الاتنين رايحين تجيبوا الكشف مش لسه بتلفوا وتسعروا الكشف لان دى اهانه ليك كفنى هو يلف على تسعير كشفه انت مالك بقى بالقصه دى يمرمطك ويلففك معاه ليه. 

طيب تمام اختار حد وانت رايحين تجيبوا الكشف اياك ثم اياك ثم اياك تطلب عده قبل الحساب وقبل مايدفع فلوس الكشف ويحاسب عليه كده انت بتثبتله ان اى حاجه تبعك هو محاسب عليها حاول تفهم زبونك قبل ماتدخلوا المحل ان اغلب الموانين بيهدى الصنايعى حتة عده على سبيل الهديه وعلى سبيل انه يتعامل معاه بعد كده ويجيبله زباين وان ده مالوش علاقه بحسابك نهائى. 

صدقنى سمعتك اهم. نيجى بقى لاهم نقطه فى الموضوع الهدايا الموجوده فى جردل البويه اذا كان زبونك من النوع الشبعان وده بيبان فى لقاءاتك معاه ان كان كريم ومتساهل ولا من النوع التانى. ان كان شبعان وكريم فهمه قصة ان الشركات بتنزل هدايا للفنى تشجيعا له على استخدام منتجها والهدايا دى ممكن تكون على شكل فلوس او على شكل نقاط بتتجمع او هدايا عينيه زى تيشرت او كاب او روله علشان مايبصلكش فى حاجه زى دى او يفكرك جايب المنتج ده مخصوص علشان الهدايا والفلوس صدقنى سمعتك اهم. اما اذا كان من النوع الصعب وغير كريم قدامك حلين انك تعرفه وهيبان على كلامه هو ناوى يعمل ايه. او انك تكتبله كشف ومون نفس كفاءة المون اللى بتشتغل بيها لكن بدون هدايا او زى الشركات اللى بتكون هداياها بالباركود اللى على المنتجات بتاعتها.

 صدقنى سمعتك اهم.

مقتطفات من فنانين مصر