 |
| مريض بالضغط العالي |
يادكتور انا مجهد بقالي فترة وقست الضغط لقيته عالي 170/100.. فجيت أطمن؟
.. بس انا مابحبش الأدوية ولا بحبكم انتم كمان.. معلش يعني ماتزعلش مني يادكتور🙂🌞
_ الاهتمام مابيطلبش يا استاذ .. مانت لو كنت مهتم كنت جيت تكشف لوحدك 😀
بعد قياس الضغط اكتر من مرة ظهر انه مريض ضغط مزمن بقاله فترة وماكنش حاسس بيه_ ودة السيناريو الطبيعي مع ارتفاع ضغط الدم _ فقولتله لازم هنمشي علي قرص ضغط علشان يبقي أقل من 140/90 ونحمي القلب والمخ والكلي والعين من اضرار ارتفاع الضغط!!!
فكانت الفاجعة..حسسني لما قولتله انه مريض ضغط ومحتاج علاج بالبرشام اني بقوله هنعمل قلب مفتوح!!!
>>> لية يادكتور.. انا طول عمري كويس.. لاحول ولا قوة الا بالله.. طيب مافيش اي حل تاني.. يعني انا كدة خلاص مريض ضغط.. مابحبش اخد علاج يادكتور.. رغم اني بشرب كركدية بس ماعرفش مابينزلش ليه؟!!.. يمكن علشان بشربه لما يبرد؟!! .. ولا هو انا لازم اشربه سخن؟؟؟.. احط كام معلقة سكر؟ ؟.. اكل ايه؟؟.. والدوا دة أعراضه الجانبية بتموت؟!.. اعمل مجهود ولا....
_باااااااس.. استهدي بالله واسمعني.. وحد الله.. دة ضغط دم بيتظبط ببرشامة مش عملية جراحية !!!.. خلاص هدي نفسك.. مش هناخد علاج بس هتعمل اللي هقولك عليه دة بالحرف.. ركز معايا.. اعمل ايدك كدة 🙌
= كدة 🖐️
_ لا بإيدك الاتنين 🙌.. لو عملت ال 10 حاجات دول مش هناخد علاج ان شاء الله 😊
1. كرشك..
= اشمعنا ؟!!
-ايوة اهو انت كدة مركز معايا وهتفهمني 😂.. عايزين نعمله بتر علشان دة مش هينفع معه التخسيس والعمليات الفافي دي 😀.. وكل 10 كيلو هنشيلهم هينزلوا 10 درجات من الضغط ان شاء الله.. يعني بحسبه بسيطة كدة محتاجين نشيل 40 كيلو علي الاقل.
2. هتركن عربيتك في الجراج وتمارس رياضة لو مشي سريع نص ساعة يوميا لمدة 5 ايام في الأسبوع
= اه فعلا من ساعة ماجبت العربية ماتحركتش وطلعلي بظابيظ من كل حتة.
3.تشيل الملح اللي علي السفرة.. وتكسر بطرمان المخلل اللي فوق دولاب المطبخ...
=مش ممكن اكل مخلل واشرب بعده كركدية؟!!
لو سمحت عد علي صوابعك ومتقاطعنيش علشان مازعلكش😏
4.هتبدل طبق المخلل بطبق سلطة خضراء وفاكهة يوميا علشان يديك المعادن المهمة لجسمك زي البوتاسيوم والمغنسيوم بيساعد في خفض ضغط الدم
5. هتبعد عن الضغوط الحياتية.. بمعني لو شغلك بيمثل عبئ نفسي عليك حاول تقلل وقت العمل دة.. او سيبه خالص وروح شغل غيره انت مش شجرة 🌳.. قلل خناق شوية في البيت مع المدام والأو...
= اكتبلي البرشام خلاص يادكتور
_ ياجدع استني انا مش عايز أي اعراض جانبية.. انت مابتحبش البرشام!!!
=يادكتور اكتب اللي تكتبه يكش 10 برشامات.. انا شجرة يادكتور اناااا شجرة 🌳 🌳 .. اكتب يادكتور الله لا يسيئك!
_ يافندم اهدى انا خايف عليك وعايز مصلحتك.. كل واحد فينا جوة طاقة بتطلع في الوقت المناسب.. احنا هنطلعهالك دلوقتى اهو
=طيب كمل.. كمل يادكتور
6. هتبطل تدخين وتشرب بداله شاي بلبن....
=...
_ انت مابتعلقش ليه؟!
=كمل ياكتور خلينا نخلص!
7.لك فنجان قهوة في اليوم او اتنين بالكتير بشرط ماتكونش بترفع لك ضغطك.. لان في بعض الناس الأكثار منها بيكون سبب لرفع الضغط
8.التأمل meditation .. هتطور عندك حس ال ال اللي هو فاهمني؟!! خلي مشاعرك فياظة ومرهف الحس.. حب الخير.. حب الجمال والحق.. وقول الشيطان مهما غواك.. لأ
9.اشرب كركدية لما تحب تشرب كركدية.. سخن بقي ساقع وربنا ولا بتفرق ماتربطش الموضوع بضغطك.. وماتكلمنيش عن الكركدية تاني علشان الموضوع دة بيعصبني😈
10. ماتشربش خمرة كتير...
=لا انا مابشربش خمرة خالص الحمد لله
_مانا عارف بس انا كنت بطمن انك مانمتش مني ومركز 😂
.
.
_ الف سلامه عليك.. ان شاء الله هتبقي زي الفل من غير برشام
=اكتب يادكتور البرشام...
_طيب والاعراض الجانبية؟!!.. والكركدية؟!!
= أكتب لي علاج يادكتور الله يخليك.. دة البرشام دة اتوصف ليا مخصوص.. إن ماكنش انا اللي يجيلي الضغط هيجي لمين؟!! .. وربنا ال 9 نقط دول مافي حاجة منهم عندي صح.. لولاش انت بس رفعت روحي المعنوية في الاخر ولولا الخمرة حرام كنت شربتها علشان ابقي جبت 10/10 😂😂😂
_علاج الضغط مهم جدا جدا بالنسبة لك ولا غني عنه.. لما ربنا يعينك وتقدر تغير عاداتك السلبية ال10 ممكن ساعتها نفكر نتنازل عن البرشام..
لكن دلوقتي علاج الضغط = حياة
تعليقات
إرسال تعليق