أسباب تجيير الورنيش الدوكو
او المجموعة
 |
| اسباب تجيير الورنيش الدوكو او المجموعة |
- علشان تتغلب على مشكلة تجيير الورنيش الدوكو او المجموعه اثناء الرش فى مكان مرطب او برد او وقتك مضغوط ولازم ترش بالليل..
- الحل موجود ان شاء الله..
- لكن فيه ٣شروط.. وشرط رابع خاص بنوع واحد من الدهانات
- اولا. نوع التنر يكون جيد جدا زى الدبابه والدبابتين.. الصاروخين.. كمبيوتر.. سوبر فاستر١٠١..
- A1..
- او تنر الفرن وده بيكون مكلف شويه..
- ثانيا.. المكان اللى هترص فيه الشغل يكون جو دافى. عن طريق تدفية المكان مثلا بإنك تشغل لمبه النور فتره طويله قبل الرش بنص ساعه ولو كانت لمبه ٢٠٠ وات يبقى مش هتحتاج غيرها وتقفل المكان كويس اوتشغل وابور غاز ان امكن او بستله فاضيه من بتوع البوليستر وتولع فيها شوية خشب بحيث يدفو المكان..
- ثالثا... وده الاهم انك يبقى جنبك حله قطرها اكبر من الجركن او الجالون اللى هتخفف فيه الورنيش وفيها ميه سخنه نازله من على السخان او النار و هتحط فيها الورنيش بتاعك والتنر بحيث يبقى الورنيش والتنر موجودين فى الجو المشابه للجو الطبيعى الخاص بحرارة الدهانات..
- الشرط الرابع انك تضيف مثلا غطا علبة صبغه على جالون الورنيش لو انت هترش على شغل مرشوش صبغه او مخدوم اسطر وماتقلقش لون الورنيش مش هيتغير بعد الرش لكن ممكن يظهر قدامك فى الخليط انه غامق بس ده شيئ عادى
- يبقى مطلوب..
- ١.تنر نضيف
- ٢ تدفى المكان اللى ترص فيه الشغل
- ٣ تدفى الورنيش والتنر علشان ينشف معاك بسرعه ومايلحقش يجير معاك..
- ٤تضيف غطا صبغه على الورنيش لشغل الاسطر ..
- وبكده تقدر تطلع الملمس المطلوب واللمعه المطلوبه بدون اى مشاكل او عقبات ورش ياباشا والجو بيشتى ولا يهمك حاجه...
- الرجاء اللى ماجربش مايعلقش بكلمة ماينفعش لكن نتمنى منه يضيف طرق علاج اخرى مجربه واللى يعرفنى يعرف ان ورشتى على السطح يعنى برش فى عز البرد لذلك دى تجربه مش اقتراح....
تعليقات
إرسال تعليق